我要掟煲費！

今日落雨，又加上我o係兩個assignment之間去做gym，所以我見到小楷楷時無化妝，著得亦比平時隨便。可惜。

話說今日係投資推廣署o既酒會上，小楷楷突然出現，令「記者台」（註：大會o係會廳o既一邊搭左個台，方便d攝記o係高處影相，但其實作用同平時無台一樣，都係有欄圍住，要記者企入去，方便公關注視）上既記者即時大為緊張。我因為靜雞雞無「上台」，同d guests吹緊水，所以有機可承。

好奇怪竟然無記者埋小楷楷身，而由於今日o既酒會氣氛好輕鬆，公關都唔係管得好嚴，我就攝下攝下咁，走左去佢身邊。

「李生…」第一次，佢笑笑口咁揮下手，示意唔答野，就走去前台準備影相。呢個時候有個公關小姐突然出現，叫我番出去。我兜左個圈又番到小楷楷身邊，佢o係度同盛智文傾緊計，我又叫左聲「李生」。（我好似仲拍左下佢手臂，當時幻想緊佢保鑣會切左我隻手落黎。）盛智文望住我，我突然唔記得佢個英文名，唯有用懶熟o既聲線同笑容hi佢，佢又好親切咁hi番我，我就拎轉頭，用「你睇下，我幾friendly」o既姿態，問小楷楷問題。點知，佢真係答。

原來，小楷楷係好林o既人，佢之後比成班記者包圍，都係好斯文咁用唔正宗既廣東話講：「你地唔比我走，我地就要企o係度啦…」，然後唔答唔答又會答。本來以為佢o係敏感時刻都黎出席酒會，實有野想講，點知又唔係。佢臨走前，南早記者攝左張卡片比佢，佢竟然又好有禮拜咁，停底回敬番自己張卡片，可惜我慢左一步，無問佢拎卡片。

但唔好誤會，我無因此而覺得佢係正君子。

番到公司，男女同事都好興奮咁問我同佢講野時，有時摸下自己耳仔、kiu下頭髮，我話，我直情摸晒成身啦。然後，大家就繼續好興奮咁，話要對我好d，我以後嫁左入李家要關照佢地，咁我都好醒咁食住個勢，即刻吊高黎賣。（當然我唔明點解問小楷楷兩句野就可以嫁比佢…）

戚老細答嘴：佢對女人未必好…。楊姐反應好快咁話，o車，要佢d掟煲費之嘛！

一言中的。